ایک نشست میں تلاوت قرآن کریم از ڈاکٹر غلام زرقانی یو ایس امریکہ

ایک نشست میں تلاوتِ قرآن کریم

رسم کہن پر افادہ واستفادہ کے پس منظر میں غورنہ کرنا بہت بڑی زیادتی ہے

از: ڈاکٹر غلام زرقانی قادری، امریکہ
ghulamzarquani@yahoo.com
۴؍فروری ۲۰۲۳ء؁

ہندوپاک کے مدارس اسلامیہ میں تعلیمی سال اختتام پذیر ہونے والا ہے اور اب آنے والے ایام میں جلسہ دستار بندی کی گونج ہر طرف سے سنائی دینے لگے گی ۔ ایسے حسین مواقع پر حفظ قرآن کریم کی سعادت حاصل کرنے والے نونہالان ملت اسلامیہ بھی نوازے جائیں گے۔ ظاہرہے کہ پورے قرآن کریم کو حرف بہ حرف اپنے سینوں میں محفوظ کرلینا کوئی امر سہل نہیں ، بلکہ اس کے لیے اوسطا تین چار سالوں تک شبانہ روز محنت ومشقت اور جدوجہدکرنی پڑتی ہے ، اس لیے بجاطورپر حفاظ قرآن کریم کی عزت افزائی ہونی چاہیےکہ ان میں سے ہر ایک روئے زمین پر تحفظ قرآن کی تحریک سے جڑے لاکھوں مسلمانوں کے درمیان ایک متحرک اکائی کی حیثیت سے نہایت ہی فعال ومتحرک کردار ادا کررہاہے ۔

مجھے نہیں معلوم کہ برصغیر پاک وہند کے دینی مدارس میںحفاظ قرآن سے ایک نشست میں قرآن کریم سننے کی ابتدا کب ہوئی ، تاہم یہ خوش گمانی ضرور ہے کہ ہمارے اسلاف نے قرآن کریم کو بہتر ڈھنگ سے یاد رکھنے اور زیادہ سے زیادہ شوق ورغبت دلانے کے لیے یہ رسم شروع کی ہوگی اور پھر اس پر انعامات واعزازات سے نوازے جانے کے شوق میں طلبہ ایک دوسرے پر سبقت لے جانے کی کوششیں بھی کرتے رہے ہوں گے ۔اس طرح لازمی طورپر اسے ایک محمود کوشش کے ذیل میں سمجھنا چاہیے ۔

ساتھ ہی ساتھ اس حقیقت کا اعتراف بھی کرناچاہیے کہ ایک نشست میں قرآن کریم سننے سنانے کے حوالے سے منعقد ہونے والی بزموں میں بڑھ چڑھ کر حصہ لینے کے لیے طلبہ ذوق وشوق کے ساتھ قرآن کریم کو باربار دہرانے کی کوشش کرتے ہیں ، جس سے ان کی یادداشت مستحکم ہوتی ہے اور ان کی خود اعتمادی میں بھی اضافہ ہوتاہے ۔ اس لیے ’ایک نشست میں قرآن کریم ‘ پڑھنے کے پس پردہ مقاصد واہداف سامنے رکھنے کے بعد مجھے اس رسم معہود سے کوئی شکوہ نہیں ہے ۔

اب آئیے ذرا ایک دوسرے زاویے سے نگاہ ڈالتے ہیں ۔دیکھیے کہنے کو تواسے ’ایک نشست‘ سے موسوم کیا جاتاہے ، لیکن عملی طورپر یہ ایک نشست میں نہیں ہوتا، بلکہ ادائے نماز ، طعام اور حوائج ضروریہ سے فراغت کے لیے کئ کئی بارطلبہ دوران تلاوت اٹھتے ہیں اور پھر جہاں پر سلسلہ تلاوت رکاتھا، وہیں سے دوبارہ شروع کردیتے ہیں ۔اس طرح آپ کہہ سکتے ہیں کہ یہ ایک نشست میں نہیں ، بلکہ صبح سے شام اور رات تک کئی نشستوں میں مسلسل پڑھنے کے بعد تکمیل کی منزل تک پہنچتاہے ۔گفتگو کی اس منزل پر پہنچ کر عرض کروں کہ بہ استثناء چند، اس طرح کی قرآن خوانی کا سب سے افسوسناک پہلو یہ ہے کہ جلدی جلدی مکمل قرآن پڑھنے کی کوشش میں طلبہ بلاکی رفتار سے تلاوت کرتے ہیں اور تجوید کی رعایت کرنے کی طرف کوئی خاص توجہ نہیں دیتے ،بلکہ سچی بات یہ ہے کہ دور سے سننے والوں کے لیے الفاظ کے درمیان فرق کرنا مشکل ہوجاتاہے ۔ یقین نہیں آتا توکسی ایسی ہی محفل میں شریک ہوکر خود ملاحظہ کرلیجیے ، یا پھر شرکاء بزم سےاستفسار کرلیجیے ۔ اور اس سے بڑھ کر افسوسناک پہلو یہ ہے کہ جب مادر علمی میں ہی بعجلت تمام قرآن پڑھنے کی پذیرائی ہورہی ہو، توفراغت کے بعد عملی زندگی میں خوش الحانی کے ساتھ قرآن پڑھنے کی توقع کیوں کر کی جاسکتی ہے ؟

آگے بڑھنے سے پہلے تلاوت قرآن کریم کے حوالے سے اسلامی ہدایات پر نگاہ ڈال لیجیے ۔ اللہ رب العزت ارشاد فرماتاہے :’’وَرَتِّلِ الْقُرْآنَ تَرْتِیْلاً‘‘ (مزمل )یعنی قرآن کریم کو ٹھہر ٹھہر کر صاف صاف اور عمدہ طریقے سے پڑھو۔حضرت ام سلمہ رضی اللہ عنہا سے کسی نے پوچھا کہ مصطفی جان رحمت صلی اللہ علیہ وسلم کس طرح قرآن پڑھتے تھے ، توانھوں نے کہا کہ آپ صلی اللہ علیہ وسلم ایک ایک حرف الگ الگ ظاہر کرتے اور آہستہ آہستہ تلاوت کرتے (مسند احمد، ۲۶۷۴۲)۔اسی طرح حضرت عائشہ رضی اللہ عنہا کی روایت سے کئی مفسرین نے متذکرہ بالا آیت کی تفسیر میں لکھا ہےکہ آپ صلی اللہ علیہ وسلم اس طرح تلاوت فرماتے کہ اگر سننے والا حروف شمار کرنا چاہے ، توبہ آسانی کرلے ( تفسیر کشاف، تفسیر تحریرو تنویر)۔اور پھر مہبط قرآن صلی اللہ علیہ وسلم نے ہمیں سلیقہ سکھاتے ہوئے فرمایا کہ قرآن پاک کو اپنی آواز سے خوبصورت بناؤ کہ اچھی آواز سے قرآن کاحسن دوبالا ہوجاتاہے (شعب الایمان)۔اور یہ بھی سنتے چلیے کہ آقاکریم صلی اللہ علیہ وسلم فرماتے ہیں کہ اللہ رب العزت اچھی آواز میں تلاوت قرآن سننے کے لیے اُس شخص سے زیادہ متوجہ ہوتاہے ، جو گانے والی سے اپنا نغمہ سن رہاہو(مستدرک، ۲۰۹۷)۔

کالم کی تنگ دامانی کا شکوہ نہ ہوتاتوٹھہر ٹھہر کرحسن ادائیگی کے ساتھ قرآن کریم کی تلاوت کے پس منظر میں نہ صرف کئی احادیث ، بلکہ مفسرین ، محدثین اور فقہاء کرام کےبے شمار ارشادات پیش کیے جاسکتے تھے ، تاہم متذکرہ بالا ایجاز سے یہ بات اظہر من الشمس ہوجاتی ہے کہ حروف کے درست مخارج کے ساتھ اور ٹھہر ٹھہر کر اچھی آواز میں قرآن کریم کی تلاوت کرنا،اللہ تعالیٰ کا حکم بھی ہے ، مصطفیٰ جان رحمت صلی اللہ علیہ وسلم کی عادت اور ہدایت بھی ہے اور قرون اولیٰ کے مسلمانوں کو طریقہ بھی رہاہے، بلکہ جان کی امان ملے توعرض کروں کہ پورے عرب میں میرے علم کے مطابق کسی حافظ سے پورا قرآن ایک نشست میں سننے کی رسم نہیں ہے ۔اور یہ بات تومیں پورے وثوق سے کہہ سکتاہوں کہ صرف حافظ ہی نہیں ، بلکہ عام مسلمان پارہ قرآن کو جلدی سے جلدی ختم کرکے فخریہ انداز میں جوخم ٹھونک کر مسکراتے دیکھے جاتے ہیں، اس قابل مذمت رسم کی ایجاد بھی برصغیرپاک وہند میں ہوئی، اسی سرزمین پر یہ پروان بھی چڑھی ہے اور یہیں کی یہ مستقل رہائشی بھی ہے ۔ الاماں والحفیظ

صاحبو! ذرا دل پر ہاتھ رکھ کرلمحے بھر کے لیے غورکیجیے کہ ’ایک نشست میں تلاوت قرآن ‘ کی جگہ اگر ’تین ایام میں تلاوت قرآن‘ کی رسم شروع ہوجائے ، توکون سی قیامت ٹوٹ پڑے گی ؟ کیا یہ ہوجائے توحفظ قرآن کے ذوق وشوق میں کوئی کمی واقع ہوجائے گی، یامدارس اسلامیہ کی شہرت وعزت پر آنچ آجائے گی ، یا پھر مدرسین حفظ وقرأت کی توقیر گھٹ جائے گی؟ ہاں اس طرح یہ ضرور ہوگا کہ تلاوت قرآن کریم کی عزت واہمیت بڑھ جائے گی اور خوبصورت انداز میں ٹھہر ٹھہر کر قرآن پڑھنے کا ماحول بن جائے گا۔

یقین کیجیے کہ حسن نیت اپنی جگہ پر، لیکن اگر کسی رسم کہنہ کے نتائج توقع کے برعکس ظاہرہونے لگیں ، توہماری مشترکہ ذمہ داری ہے کہ ہم کھلے دل سے اعتراف بھی کریں اور اس کی اصلاح بھی کریں۔

نیچے واٹس ایپ ، فیس بک اور ٹویٹر کا بٹن دیا گیا ہے ، ثواب کی نیت سے شیئر ضرور کریں۔