یہ کیسا نظامِ آزادی از فریدی صدیقی مصباحی مسقط عمان

 یہ کیسا نظامِ آزادی ؟

یوم آزادی پر موجودہ حالات کی منظر کشی کرتی ہوئی نظم

فریبِ اہلِ سیاست ، نظامِ آزادی

جدید قید ملی ہے بنامِ آزادی

ہمیں وہ پھیردیں جب چاہیں جس طرف چاہیں

ہے چند لوگوں کے ہاتھوں ، زِمامِ آزادی

گَلا کسا ہے مگر سانس پر ہی خوش رہیے

بُنا گیا ہے کچھ اِس طرح دامِ آزادی

خراب حال مسلسل ، کسان اور مزدور

وزیر و شاہ و غنی ، شاد کامِ آزادی

حقوق سلب ، زمیں تنگ ، عزتیں پامال

یہ حُرّیَت ہے، کہ ہے اِنہِدامِ آزادی

یہ بھیدبھاؤ ، یہ نفرت کی سرحدیں باہم

ہیں منقسم کئی در پر ، غلامِ آزادی

بندھا بندھا سا تَخیل ، ڈرا ڈرا سا قلم

کئی حدوں میں ہے محصور ، گامِ آزادی

بہایا جائے گا انصاف کا لہو کب تک

سحر میں بدلے گی کس روز ؟ شامِ آزادی

کوئی بھی پھول نہ خار الم سے ہو زخمی

خدایا ہند ہو ، دارالسلامِ آزادی

جہاں میں سب سے حسیں ، سب سے انقلاب آور

مرے نبی نے جو بخشا پیام آزادی

زمانے والو ! نظر ڈالو فتحِ مکہ پر

کہیں نہ پاؤ گے وہ اہتمام آزادی

حدودِ ملک و وطن ، مومنوں کی زنجیریں

حِصارِ رنگ و نسَب ، اختتام آزادی 

اگر عروج وترقی کی راہ چلنی ہے

تو لازمی ہے وطن میں قیام آزادی

کسی کے دست و زباں سے کسی کو رنج نہ ہو

ہمیشہ سب کریں یوں احترامِ آزادی

جہاں نحیف صدائیں پہنچ نہ سکتی ہوں

نہ اتنا اونچا کرو یارو بامِ آزادی

زمینِ ہند ، مسلماں پہ تنگ کر کے تم

عزیزو  لیتے ہو کیا انتقامِ آزادی ؟ 

بہارِ امن و اماں کو نگل رہے ہیں فساد

بتاؤ کیا ہے یہی ؟ انتظامِ آزادی 

کلیجہ چھلنی ہے ، پَر ساتھ سب کا دینا ہے

چلو فریدی ! پیو تم بھی جامِ آزادی

از : فریدی صدیقی مصباحی، بارہ بنکوی، مسقط عمان

 96899633908+